LA PAJINA DJUDEO-ESPANYOLA
AKI YERUSHALAYIM
Revista Kulturala Djudeo-espanyola

PAJINA DE ENTRADA

AKI YERUSHALAYIM

ULTIMO NUMERO

Algunos numeros anteriores de Aki Yerushalayim

AKI YERUSHALAYIM #89

KOMO DESKUVRI LA SINAGOGA DE CORIA?
Jacques Cory

Esta istoria se puede meldar komo algo realista o surrealista. Algunos van a dizir "se non e vero e ben trovato", otros van a meldarla kon septisizmo, maravia o inkredulidad. No so un arkeologo, istoriador o un medium. So un ombre de negosios, kon un doktorado en etika de negosios. Do kursos en varias universidades, eskrivi livros akademikos, artikolos, un roman, una ovra de teatro, algunos poemas.i tengo tambien un sitio de internet. Kada uno a su manera…

El 10 de Agosto de 1998 eskrivi una letra al mayor de Coria, en Espanya, anunsiandole ke tenia la intension de vijitar su sivdad siendo ke mi alkunya, Cory, es una indikasion ke es posible ke mis antepasados bivieron en Coria.

Le dishe ke mi lingua materna es el ladino, ma ke tambien estudyi el kastilyano. Adjusti ke moro en Israel, nasi en Ejipto, de padres i nonos provenientes de Gresia i Turkia, i ke estuvi munchas vezes en Espanya por echos.

El 20 de agosto de 1998 el mayor de Coria me eskrivio: "Saluda a D. Jacobo Cory, y siendo conocedor del interes que tiene por visitar nuestra Ciudad me complace en invitarle y recibirle, dada la importancia de la empresa que le mueve venir hasta nuestra tierra. Jose Ma. Alvarez Pereira
aprovecha esta ocasion para expresarle su consideración personal."

El mizmo dia resivi un e-mail de Juan Pedro Moreno, arkeologo responsable del "Servicio de Asesoramiento Historico Cultural" de la munisipalidad de Coria ke me eskrivio: "El motivo de su visita me parece muy
interesante y apasionante. El señor alcalde me ha transmitido su intencion de visita. Coria, guarda en su memoria historica el nombre de Calle de la Sinagoga, y hay dos posibles ubicaciones. Esperamos verle pronto por
nuestra/su ciudad; sera bien recibido."

El 24 de agosto de 1998 le eskrivi ke me gustaria mucho vijitar la sivdad i ver los lugares onde se topan la sinagoga i la juderia. Puede ser ke kon mi DNA podre despues de 500 anyos, ayudar a topar el lugar exakto onde bivian mis antepasados. Es muy importante para el turizmo de su sivdad… Ya ve Ud. Ainda se un lokalpatriota i espero azer algo para kontribuir a la ekonomia de muestra sivdad…"

El dia de 8 de Oktobre vijiti la vieja sinagoga de Castelo de Vide, del otro lado de la frontiera, en Portugal, i observi komo avia sido konstruida. El 9 de Oktobre viaji kon mi mujer Ruthy a Coria onde fuimos resividos por Juan
Pedro Moreno. El me amostro tres posibles lugares de la sinagoga ma yo elimini los dos primeros (DNA, intuision o mazal?) Kuando arivimos al treser lugar, me disho Moreno ke avia un problema porke la vieja ke bivia ayi no akseptava de avrir a ninguno. En subito, esta vieja (la senyora Castañera), ke se asemejava exaktamente a mi madre, salio de su kaza. Le dishi ke vengo de Israel, me yamo Cory i ke la orijin de mi famiya es de Coria; keremos bushkar onde esta la sinagoga i le rogamos ke mos permeta de entrar a su kaza. Eya
sonrio i mos invito a entrar.

Kuando entrimos, vidi ke la kaza estava konstruida exaktamente komo la sinagoga de Castelo de Vide. Ma el portal era kuadrado i no en arko komo en la sinagoga de Vide. Kuando le demandi deke, eya me disho ke sintio de su
familia ke moro en la mizma kaza durante siglos, ke el portal original era en arko ma se destruyo durante el terremoto de 1755. Bashimos a la bodega i eya mos mostro algunos livros antiguos ma el mas antiguo era del anyo 1500, despues ke los djidios ya avian sido ekspulsados de Espanya, en 1492. Eya disho a Moreno ke estava de akordo a ke se agan exkavasiones en su kaza para investigar los restos de la sinagoga.


Entrada a la kaza de la Sea Castañera

Moreno me regalo un livro "Coria y Sierra de Gata" i eskrivio: "Para nuestros amigos israelitas, que este libro suponga un paso más para el encuentro de unas culturas que nunca debieron separarse."

En 1999 la kaza de la senyora Castañera fue vendida a una persona privada i asta 2011 no se izieron ayi ekskavasiones. Moreno me disho ultimamente ke, bushkando en los archivos de Coria topo provas ke esta kaza fue efektivamente la kaza de la sinagoga, ma no se puede vijitarla agora siendo ke biven ayi privados.

En la internet meldi ke la komunidad djudia de Coria se remonta al siglo XII. En su juderia bivian aproksimamente unas 46 famiyas ke se dedikavan a los ofisios de tornero, shastre, platero, kovrador de impuestos, etc. Yo presumo ke al ser proklamado el Edikto de Ekspulsion, en 1492, los djidios de Coria (kon mis antepasados probablamente) se fuyeron al Portugal ke era serka de la sivdad. Pensavan que tornarian a Espanya bien presto i desharon la sinagoga al kudyado de una famiya, ke troko su alkunya, sigun lo izieron munchos konversos, kon nombre de arvole - Castañera, el mizmo de la mujer ke ayinda morava ayi en 1998. Tomaron kon eyos todos los livros ebreos i por esto no avia en la kaza ningun livro de antes del anyo 1500.

Los djidios de Portugal fueron forsados a konvertirsen al kristianizmo, ma munchos se fuyeron despues, kon la kolaborasion de Dona Gracia Mendes i otros, yegando a Turkia, Gresia. Italia (onde mi famiya moro asta ke emigraron a Ejipto), Israel, Fransia o Brazil. La senyora Castañera, ke problabamente savia ke su kaza avia sido sinagoga, desidio a su vejez de permeter ke se agan ekskavasiones afin ke eya torme a kumplir su funksion inisial - de sinagoga. Su semejansa kon mi madre no es una ilusion optika porke tenemos fotos kon eya, ma la verdad es ke munchas djudias sefaradis se asemejan asta agora a espanyolas, porke no se kazaron kon otros ke sefaradis durante 500 anyos.

La simpatia ke mos amostro, avriendo su kaza a un djidio israeli kuando no keria avrirla a sus konsivdadinos, prova probablamente ke eya savia algo sovre sus antepasados djidios. Ma ken save komo se pasan las kozas, por ke desidi vijitar a Coria, por ke el arkeologo me demando ke le ayude a topar la sinagoga, deke la vieja desidio avrirnos su kaza, komo un desendiente de Coria viniendo de Israel deskuvrio la sinagoga despues de 500 anyos? Sera una echizeria, una istoria lojika, una koza de nada? Ken save?

Como me siguen
En fila interminable
Todos los yos que he sido!
Como se abre el ante mí
En infinita fila
Para todos los yos que voy a ser!
Y que poco, que nada soy yo
Este yo, de hoy
Que casi es de ayer,
Que va a ser todo de mañana!

Juan Ramon Jimenez
La realidad invisible, El presente

 

Volver